لاجيت ابقـولها لــــــك ترجـف اعظــــامي

انا استحي منك واجاملك واهابك
ولاجيت ابقولها لك ترجف اعظامي

مليت اداري الغلا واهيم واشقابك
ومليت اشوفك سحايب وارجع الظامي

وتعبت من كثر ترحابي وترحابك
وتعبت اشوفك حقايق واجهل اوهامي

اموت واعرف شعورن فيك ينتابك
وتموت وتعرف سبايب عظة ابهامي

مسيرة العمر جابتني على بابك
وعليك حسبة ليل العمر وايامي

وماكتبتك غلا اوعدك لقرابك
وعن حب غيرك عهد لنكس اعلامي

اعجابي اسعدك وانا اسعدني اعجابك
وصار الغلا بيننا محتوم والزامي

حمامة الشوق طارت بي مع اسرابك
من وين امد النظر صورتك قدامي

ارسم تفاصيل عينك واعشق اهدابك
واضيع بين السطور وتدمع اقلامي

تدري وش اللي حصل يالترف باسبابك
اسهر اناجيك اليـــن تـمـر باحلامـي

وتدري وش اللي ذبحني وحرق اعصابك
لاجيت ابقول احبــــــــك ترجف اعظامي !!